De Ignacio Bernardo. Plaza de la Constitución.
Piedrasblancas.
Tubu namoráu- 31-12-…
Llegué de nueche a
la plaza de la ciudá. Sentéme nun bancu a descansar. Descansar ensin tar
cansada. Más que nada pa matar el
tiempu de la nueche, que prometía ser llarga…Silenciu. Silenciu ente’l silenciu. Silenciu y soledá. Ellí, llantáu nuna esquina, taba él. El so
cuerpu de fierru, espigáu, tiesu, inmóvil. Dos cuerpos fundíos nun solo cuerpu.
Na pequeña fendedura que s’abría ente l’amor, el
so corazón, tresparente como l’agua, galdíu de tanto amase. Los mios güeyos
asomáronse a la ventana, la ventana del
deséu, illuminada pola lluz d’una farola que dende lloñe yera testigu d’esta escena d’amor indeformable, xeométricu, perfeutu. Amor de fierru.
Per aquella ventana
irregular, asomábase la Lluna,
redonda como un platu y cola cara arroxada. Nueche
de Lluna enllena presidiendo l’amor y el desamor.
Mirélu, contemplélu
y recreéme na escena. Amor desnudu, inalterable, amor de
fierru, amor ensin torgues, amor, amor…
Averéme un poco más
y pudi lleer la lleenda que taba escrita a los sos pies, “tubo enamorado” 31-12- 1.....
Yo acababa de
sentir na mio carne'l desamor. Un deséu mui fuerte de llorar enllordiábame les
coraes. Abracéme a ellos. Les mios llárimes regaron l’amor, como regueros
ferruñosos que figuraben caminos llargos, llaberintos... La frialdá del fierru apegóseme al corazón.
(Mª Esther García López, A la gueta l’amor )
No hay comentarios:
Publicar un comentario