María Esther García López-España/Febrero de 2013

CUIDEIRU

Tu corazón empapáu de salitre.

El Sol na ventana del espaciu.

Las gaviotas que se pousan nos balcones.

Ya que cantan, ya que glayan, tarariando.

Ya los güeyos de la mar que m’encandilan.

Ya‘l brillu del  Sol tan  perfumáu.

Espiertan  los pensamientos de la nueite.

Ya los sueños pola cai desfilando

Las pasiones  ya los besos, semaos pol asfaltu.

Miro dende lo alto l’horizonte

  la l.liende l.lonxana del espaciu.

Ya’l blancor de las casas.

Ya los cuentos, ya los cantos.

 El cantar de las xanas, el cantar de las serenas.

Ventolinos, remolinos ya remansos.

Ya la fonte d’augua plata,

que me mata la sede d’un abrazu.

El branu que chega somnolientu,

filvanando historias d’embarcaos.

La nublina tresparente y glamurosa.

Ya los sones suaviquinos  de los páxaros.

El silenciu mañaneru que pasia

polas calles, solitariu, de la mano.

De la mano del aliendu del riscar.

De la mano del alba ya l’ orbayu.

Las campanas   xuguetian sones l.largos.

Ya’l tiempu al outru l.lau de la ventana.

Ya’l tiempu que caleya   cai  abaxo.

Ya las flores, ya los praos,

Ya las fiestas,  ya los cantos.

Ya la voz de las muyeres ya los homes.

Ya las redes que s’enredan  nas tuas manos.

Ya  las llanchas, ya las l.liendas.

Ya la L.luna.

Cuando chega la nueite alborotando.

La estrellas que presiden  los tous sueños.

Los abrazos, los amores

no l.lugar más deseáu.

La nublina friolenta de la nueite,

cuerre apriesa a dormir al empedráu.

Los pixuetos ya pixuetas,

ya la xente d’outros l.laos.

Las noticias de los homes embarcaos.

Ya la gaita que chora las ausencias.

Ya los nenos que dormecen, arrol.laos. 

El  burbús de la mar, ya outros cantos.

Nos requeixos  de l’aurora

  la solombra de los outros que se fuenon.

Solombras ya figuras espumosas

que s’esmucen, como’l tiempu,

ente l’augua de las folas  ya‘l remansu.

El  tiempu al outru l.lau del horizonte.

 Un pintor  que pinta un cuadru.