Sona’l turul.lu
Sentí xiblar el turul.lu
Ya encoyéuseme hasta l’alma
¡Una nena inda pequena,
con muitu miedu na cama!
Tenía pavor al l.lobu
A la truena, ya a pantasmas.
Non, mio nena, non.
Nun chores.
Tate, tate, na tua cama,
Que, nada, nun pasóu nada.
Aiquí nun vei entrar el l.lobu,
Ya la truena ta calmada.
Tate tranquila mia nena.
Que, nada, nun pasóu nada.
El turul.lu sona l.lonxe
La sua voz, entecortada.
Aiquí nun ha chegar la quema.
Nin outras cousas qu’amagan.
Mira, mira que guapura
Lo que ves pola ventana.
Al.li arribón ta la l.luna
Que rel.luma regal.lada
Mira, ¡mira que yía guapa!
El.la nun tien mieu a nada.
Nun la espanta'l turul.lu,
Y bril.la con l.luz prestada.
Mira la L.luna mio nena.
El turul.lu yá nun sona.
Mira la l.luna, descansa.
No hay comentarios:
Publicar un comentario