martes, 1 de enero de 2013

María Esther García Martínez-Piedras Blancas, Asturias, España/Diciembre de 2012


A la gueta l’amor


Día de fiesta, d’amor, d’ilusiones, de tochures, de desengaños... Nes calles y places palidecía la tarde de marzu. Miraes duldoses, güeyos confusos. Dalgo enllenaba d’entrugues l’espaciu.
Yo ellí, dempués d’una xornada caleyando d’un llau pa otru, como quien va desesperada a la gueta d’aquello  polo que nagua fondamente y nun lo alcuentra. Nada, nada socediera  nun día enteru de penuria, nun socediera pa mi nada especial. El desesperu encomenzaba a dibuxase na mio cabeza.
La nueche llegó pronto y encendiéronse les faroles xusto cuando yo llegaba a la Plaza de Carlos Lobo, na qu’había gran animación: arumes fuertes, voces, bulla y tipos raros ..Mentanto, yo, sorprendida, embabiecada,  contemplaba toes aquelles escenes. Too xente desconocío. Dos moces probaben unos pendientes que cuasique-yos  llegaben hasta l’escote, quedéme mirándoles y elles miráronme mal  y encomenzaron a marmullar y a rise polo baxo.  La trsitura encomenzaba a invadir el mio corazón. Y, al dar media vuelta,  delantre de mi,  otra vez el fotógrafu.
-¿Una foto, guapa?
-Pero, por favor, si acaba de faceme una foto xunta La Foca’l Parque’l Muelle.
Esti por qué reparará siempre en mi.
-Perdón, perdón, nun t’engafes, guapetona.
Guapetona, guapetona. Toi de piropos hipócrites hasta les narices.
Yo diba apriesa, azotada, d’un llau pa otru, asonsañando a aquella xente que daba vueltes alredor  de la plaza. Recorrí tolos puestos: veles, boles, bixos, teles, pañuelos, figures, cartes... Y pola ventana que se figuraba nel cielu nel marcu de la plaza, asomábase la  Lluna qu’allumaba dende lo alto esti insólitu  mercáu.
Paréme delantre d’un puestu nel que nun cartel grande y llamativu podía lleese: “Viéndese amor”.
¿Amor? –pensé pa mi- pero… ¿ye posible?
¿Tantu tiempu que llevo a la gueta l’amor, y equí comercializáu? ¿Los científicos llegaron a sintetizar l’amor?
Y sentí, de sópitu la so voz:
-Yo, yo soi l’amor. Dixo mirándome de soslayu y esfumóse pente la xente...
-¡Cómo te cotices! –Dixi yo enfurruñada.
Ná, la emoción foi intensa pero too ocurrió nun tris, pronto comprendí que yera una engañifa del mio maxín, una visión. Dime la vuelta y, xusto delantre’l puestu aquel,  l’amor entrellazaba dos cuerpos ente los que nun cabía nin una guya. Un suspiru allugóse nel mio corazón. ¡Qué guapo! L’amor, nun hai dulda, pasiábase pela Plaza de Carlos Lobo. Por fin, yo taba nel sitiu afayadizu. Nel sitiu onde podía dar col amor, de xuru.
Sentéme no borde la cera, como una méndiga  pidiguñando amor, al son d’unos vigulines qu’un poco más p’alla poníen música de fondu a esti momentu, y glayando al altu la lleva encomencé a recitar el poema:
Por una mirada un mundu
Por una sonrisa un cielu
Por un besu, yo nun sé
Qué te diera por un besu.
-H.a, h.a, h.a... ¡La poeta, la poeta, pero si se cree Bécquer, -h.a, h.a, h.a,  ríase un rapazón faciéndome la burlla.
-Espera, nun desesperes, sigue recitando, díxome  ximielgando aquel corpachón y arrastrando les palabres.
(Borrachu, otru borrachu, pero si toos tán borrachos)
-Sonriráte, mozona, afalagaráte, ate, ate, ate, ate...
¡Qué situación! ¡Qué caro ye l’amor! Llevantéme y empobinéme otra vez al  puestu de venta. Y una gran cola de pareyes, ún enrosacáu nel otru, besándose  esfamiaos, como quien quier fundise nun solu cuerpu, alimentaben  pasiones.
-Pero, ¿qué pasa equí?¿Qué puestu ye esti?
Pero, ¿qué ye que lo regalen pa qu’ haya esta cola? Pero qu’amor ye’l que se comercializa nesti puestu? ¿Amor sintéticu? ¿Amor de llaboratoriu? ¿O ye qu’estos  toos que s’amen intensamente inda quieren más? Yo ¿qué coño tengo que facer pa mercar l’amor? Y volvía  a oyer la so voz:
-¡Sacar númberu como na tienda, tontona!
¡Qué triste! Puru consumismu. Güei too se merca, hasta l’amor... ¡Qué non, home, que non, qu’esto nun va   conmigo. Niégome- dicía yo, falando sola, pente aquel tropel de xente que me miraba raro.
-Y asina te va- díxome otra vez aquella voz misteriosa.
Y mentanto,  la filera de pareyes facíase más llarga y yá tomaba tola calle La Fruta.
Yo, pidí una copa no bar de L'Alfarería  y cola copa na mano, faciendo esparabanes y aicionando pa llamar l’atención, fui calle alantre  recitando a Bécquer:
Por una mirada un mundu
Por una sonrisa un cielu
Por un besu, yo nun sé
Qué te diera por un besu.
Que non, home, que non, ¡facer cola pa mercar l’amor! Nin de coña- dicía yo mirando al cielu.
Y otra vez la vozona reprendíame ensin compasión.
-Eso, eso, né, glaya al altu la lleva, tienes el don de la palabra, pero  primero tienes que buscar el galán, o nun ves qu’equí toos van empareyaos. O lo tuyu va ser “amor en solitariu”. Espabila, güei nun ta de moda ser romántica.
Y encomenzó a llover a xarraos. Nun tris tapáronse tolos puestos y la xente corrió  a abellugase onde pudo. Los amantes, colos cuerpos empapaos pol agua, pintaben una escena erótica. Y l’aventura acabó, como ta escrito, como ye inevitable qu’acabe: nun hai nengún día redondu. Como diz el poeta:
 Llueve, señores,
Llueve gotes gordes y punzantes
que m’empapen l’alma...”
La lluvia encargóse de borrar tolo qu’aquel día de fiesta s’escribiera no mio corazón. El golor a frescor y a humedá, el vapor que desprendía la calle llimpiaba dafechu’l mio maxín y preparábame pa encomenzar la rutina d’un nuevu día.
Dempués de la tempestá llega la calma.

No hay comentarios: